Oflopen 20 september was bi’j resteraant Boszicht in Ni’jberkoop de prissentaosie van et boek Van Ostbrockop naor Ni’jberkoop. Et verhael van een klein dörp in Stellingwarf. De Prissentaosie wodde een gezellig feest veur veul oold-Ni’jberkopers.

Roem 80 personen maekten disse biezundere middag mit. Et gong daorbi’j veural om oold-inwoners van Ni’jberkoop, die allemaole mit verhaelen, infermaosie of deur et beschikber stellen van foto’s mithulpen hebben an et boek. In et 332 bladzieden dikke boek op A-4 fermaot beschrift Sietske Bloemhoff de geschiedenis van et dörp daor ze opgruuide, en waor ze vanof 2010 weer woont.

De eerste twie exemplaoren

Halverwege de 90-er jaoren gongen Andries van der Veen en Sietske Bloemhoff uut aende mit de veurbereidings veur een film en een boek over Ni’jberkoop. Beide weren ze opgruuid in dit dörp en hadden veul belangstelling veur de geschiedenis d’r van. Op heur verzuuk kwam op 29 feberwaori 1996 een hiele groep (oold-)Ni’jberkopers bi’j mekere in de kantine op et vroegere sportveld. Die groep wodde verdield in vuuf kleinere groepies, en die vertegenwoordigden ieder een bepaold diel van et dörp.

In de daorop volgende bi’jienkomsten bin van elk van de groepen veul gegevens en verhaelen neteerd, en die bin gelokkig allemaole goed beweerd bleven. Want veul veerder kwam d’r van et onderzuuk en et uutwarken daorvan in een boek in de jaoren daornao niet terechte. Dat hadde veural te maeken mit et de hieltied meer uutbreidende wark van Bloemhoff bi’j de Stellingwarver Schrieversronte. Pas een peer jaor naodat ze in 2020 mit pensioen gong kon ze de draod weer oppakken.

Ok vanof 2023 het Andries van der Veen, die in feberwaori 2025 uut de tied raekte, van groot belang west veur et boek. Hi’j vertelde Bloemhoff in die periode nog veul over Ni’jberkoop, en dan mit naeme over de buurtschoppen Iegypte en ’t Zaand.

Et eerste exemplaor van Van Ostbrockop naor Ni’jberkoop is dan ok mit om die reden oflopen zundag uutrikt an zien vrouw Truus van der Veen-Lamberts, die, daor waor ze kon, zels ok zoveul meugelik mithulp.

Et boek is opdreugen an Andries van der Veen, mar ok an Albertje Bloemhoff-Seinstra, de mem van Sietske. “Mien interesse veur de omgeving daor ik opgruuide heb ik veur een groot pat te daanken an mien mem Albertje Bloemhoff-Seinstra”, zo geft Sietske in et ’Even veurof’ in et boek an. “Zi’j vertelde bi’j oons thuus veul over vroeger, en we kuierden ok hiel wat of in de netuur om oons henne. Et is ok om die reden dat ik et boek an Mem opdreeg.”

Et twiede exemplaor van et boek was veur Henk, de bruur van Sietske, die in zien daankwoord diezelde ervering ok nog even anhaelde, en ok alle lof hadde veur dit biezundere boek.

Abbendiek lange leden de Stellingwarver greens mit Drenthe

In Van Ostbrockop naor Ni’jberkoop wodt et verhael verteld van een klein dörp in Stellingwarf. Et ontstaon van Ni’jberkoop moet argens tussen 1200 en 1300 west hebben, dat et verhael begint rond die tied. De eerste vermelding van Ni’jberkoop was in 1320. Ostbrockop, zo hiette Ni’jberkoop doe, wodde dat jaor in een oorkonde nuumd. Ok Berkoop wodde nuumd, dat plak hiette in die tied Oldenbrockop.

Behalven Ostbrockop en Oldenbrockop is in dezelde oorkonde ok de naeme Westbrockop te zien. Dat kleine plakkien lag even westelik van Berkoop, en zol laeter opgaon in Ni’jhooltpae. Deur disse oorkonde is bekend dat in 1320 Ostbrockop en Westbrockop elk al een appatte perochie weren. Eerder heurden beide bi’j et ooldere Berkoop, dat as Brokope veur et eerst in 1232-1233 vermeld wodde.

Ostbrockop is dus ontstaon vanuut Brokope, en wodde een appatte perochie, een dörp mit een eigen karke. Wanneer de ofsplitsing percies west het is niet bekend. Wat wél bekend is, is dat Ni’jberkoop nooit iene van de oostelike dörpen west het die tot 1328 bi’j Drenthe heurden, zoas wel es docht wodt. Beide dörpen weren perochies van et ooldste Stellingwarf, en dat was ongeveer et gebied dat vandaege-de-dag West-Stellingwarf is. Dat tot 1328 lag de greens tussen Stellingwarf en Drenthe ongeveer op et plak waor now Abbendiek ligt.

Kedoboek veur veul oold-Ni’jberkopers

Bi’j et schrieven van et boek is vanzels veural veul gebruuk maekt van literetuur over de geschiedenis van Stellingwarf, van oolde kaorten en van de zonuumde stem- en floreenkohieren. In Van Ostbrockop naor Ni’jberkoop bin ok veul berichten uut oolde kraanten verwarkt en d’r wodde daankber gebruuk maekt van et blaederboek Nijeberkoop in tekst en beeld, daor Eize Brouwer en Jelle van der Muur in 2005 veur zorgden.

V.l.n.r.: Jelle Geert van der Veen, vormgever Bauke Visser Koenders, Henk Bloemhoff, Truus van der Veen-Lamberts, Anieta Roordink-van der Veen en auteur Sietske Bloemhoff. (foto: Lenus van der Broek).

Niet in et laeste plak hebben hiel veul (oold-)inwoners mithulpen an et boek. Zi’j zorgden d’r mit heur persoonlike verhaelen en herinnerings veur dat dit boek ok echt Et verhael van een klein dörp in Stellingwarf wodden kon. Om die reden wodde nao de prissentaosie et boek an al die meensken uutdield. Dit gebaor wodde biezunder op pries steld, mar iederiene leut ok weten hoeveul wardering ze veur alle wark van heur oold-dörpsgenoot hadden.

Et boek, dat 30 euro kost, is een uutgifte van Stichting Beeldige Tael, Veur de fraaie vormgeving zorgde Bauke Visser Koenders van Haulerwiek. Et boek dat mit financiële steun van Stichting Lammert Brouwer Fonds, Stichting Bercoop Fonds en Archief Ni’jberkoop uutgeven wodden kon, kan besteld wodden via et mailadres s.a.bloemhoff@gmail.com.